ဟိုတယ်တွင် နံနက်စာသုံးဆောင်ပြီးနောက် ဗုဒ္ဓမြတ်စွာဘုရားသည် ဘုရားအဖြစ်သို့ ရောက်ရှိပြီးနောက် ရေချိုးသန့်စင်ခဲ့သည်ဟု ယုံကြည်ကြသည့် သမိုင်းဝင် နိရဉ္ဇနာမြစ်(Niranjana River) ကို ဖူးမြော်လေ့လာပါမည်။ ထို့နောက် ဗုဒ္ဓဂယာမြို့၏ အနောက်ဘက် ၂ ကီလိုမီတာခန့်အကွာ၊ ဖလဂုမြစ်အနီးတွင် တည်ရှိပြီး ဘုရားရှင်မဖြစ်မီ သိဒ္ဓတ္ထမင်းသားအား ဆွမ်းအာဟာရ လှူဒါန်းခဲ့သည့် ဥရုဝေလကျေးရွာသူ သုဇာတာအိမ် (Sujata House) နှင့် အမှတ်တရနေရာကို လေ့လာပါမည်။ ၁၉၈၉ ခုနှစ်၊ နိုဝင်ဘာလ ၁၈ ရက်နေ့တွင် ဖွင့်လှစ်ပူဇော်ခဲ့သည့် ၂၅ မီတာမြင့်သော ပေ ၈၀ ဗုဒ္ဓရုပ်ပွားတော်ကြီး (80 Feet Buddha Statue) အား ဖူးမြော်ပါမည်။ အဆိုပါ ဗုဒ္ဓရုပ်ပွားတော်ကြီးအား အိန္ဒိယနိုင်ငံသမိုင်းတွင် ထင်ရှားသော ဗုဒ္ဓရုပ်ပွားတော်များအနက် တစ်ခုအဖြစ် သတ်မှတ်ထားပြီး ဖွင့်လှစ်ပူဇော်ပွဲတွင် ၁၄ ဆက်မြောက် ဒလိုင်းလားမားကြီး ကိုယ်တိုင် လာရောက်ဖူးမြော်ဖွင့်လှစ်ပေးခဲ့ပါသည်။ ယနေ့တွင် ဗုဒ္ဓဂယာ၏ အထင်ကရ သင်္ကေတတစ်ခုအဖြစ် တည်ရှိပြီး ကမ္ဘာတစ်ဝှမ်းမှ ဘုရားဖူးများ လာရောက်ဖူးမြော်ကြပါသည်။ ထို့နောက် ဟိုတယ်တွင် နေ့လယ်စာ သုံးဆောင်ပြီးနောက် ဗာရာဏသီ (Varanasi) သို့ ကားဖြင့် ဆက်လက်ထွက်ခွာ ပါမည်။ ညနေပိုင်းတွင် ဂင်္ဂါမြစ် (River Ganges) အတွင်း လှေစီးခြင်းဖြင့် ဂင်္ဂါမြစ်၏ သဘာဝအလှအပများနှင့် ဗာရာဏသီမြို့၏ ထူးခြားသော ညနေခင်းမြင်ကွင်းများကို ခံစားကြည့်ရှုပါမည်။ ဟိုတယ်သို့ Check-in ဝင်ကာ ညစာသုံးဆောင်ပြီးနောက် အနားယူအိပ်စက်ပါမည်။

ဟိုတယ်တွင် နံနက်စာ သုံးဆောင်ပြီးနောက် သာရနတ် (Sarnath) သို့ သွားရောက်လည်ပတ်ပါမည်။ သာရနတ် (Sarnath) ရှိ မြတ်စွာဘုရားသည် ဘုရားအဖြစ်သို့ ရောက်ရှိပြီးနောက် ပထမဆုံး ပဉ္စဝဂ္ဂီ (၅) ဦးအား ဓမ္မစင်္ကြာတရားတော်ကို ဟောကြားခဲ့သည့် အထင်ကရ သာသနာ့မြေနေရာဖြစ်သည့်အပြင် ဗုဒ္ဓဘာသာသမိုင်းတွင် အလွန်အရေးပါသော နေရာတစ်ခုလည်းဖြစ်သည့် Deer Park (မိဂဒါဝုန်တော) သို့ သွားရောက်လေ့လာဖူးမြော် ကြပါမည်။ သာရနတ်၏ ထင်ရှားသော အထိမ်းအမှတ်နေရာများအနက် ဓမ္မရာဇိကစေတီ (Dharmarajika Stupa) နှင့် ခြင်္သေ့လေးကောင်ပုံပါဝင်သော အထင်ကရ ရုပ်တုကြီးတို့ကို ဖူးမြော်လေ့လာနိုင်ပါသည်။ ထို့အပြင် ရှေးဟောင်းသုတေသနပြတိုက်တွင် ဘီစီ ၃ ရာစုခန့်မှစ၍ တူးဖော်တွေ့ရှိရသော ရှေးဟောင်းပစ္စည်းများနှင့် ဗုဒ္ဓဘာသာဆိုင်ရာ အဖိုးတန်အမွေအနှစ်များကို လေ့လာကြည့်ရှုနိုင်ပါသည်။ ရှေးဟောင်းသာရနတ်အပျက်အစီးများအကြား တည်ရှိသည့် ခေတ်မီဗုဒ္ဓဘာသာဘုန်းတော်ကြီးကျောင်းတစ်ခုဖြစ်ပြီး ၁၉၃၁ ခုနှစ်တွင် မဟာဗောဓိအသင်းမှ တည်ဆောက်ခဲ့သည့် မူလဂန္ဓကုတီဝိဟာရတိုက် (Mulagandha Kuti Vihar) အး သွားရောက်လေ့လာဖူးမြော်ကြပါမည်။ အတွင်းပိုင်းတွင် လက်ရာမြောက်သော ပန်းချီဒီဇိုင်းများဖြင့် အလှဆင်ထားပြီး Frescoes နှင့် Murals များကြောင့် ထင်ရှားလှပြီး ဂျပန်နိုင်ငံ၏ ထင်ရှားသော ပန်းချီဆရာ Kosetsu Nosu ရေးဆွဲထားပြီး ဗုဒ္ဓဘာသာဆိုင်ရာ အကြောင်းအရာများနှင့် သာသနာ့အမွေအနှစ်များကို ထင်ဟပ်ဖော်ပြထားပါသည့် ရောင်စုံပန်းချီလက်ရာများကိုလည်း မူလဂန္ဓကုတီတိုက်အတွင်း လေ့လာနိုင်ပါသည်။ အိန္ဒိယနိုင်ငံ ရှေးဟောင်းသုတေသနဌာန၏ ရှေးအကျဆုံး ရှေးဟောင်းသုတေသနပြတိုက်များအနက် တစ်ခုဖြစ်သည့် သာရနတ်ရှေးဟောင်းသုတေသနပြတိုက် (Sarnath Museum) သို့ သွားရောက်လေ့လာပါမည်။ သာရနတ်ဒေသအတွင်း တူးဖော်တွေ့ရှိရသော ရှေးဟောင်းပစ္စည်းများနှင့် ဗုဒ္ဓဘာသာဆိုင်ရာ အဖိုးတန်အမွေအနှစ်များကို ထိန်းသိမ်းပြသထား သည့် နေရာဖြစ်သောကြောင့် ဗုဒ္ဓဘာသာသမိုင်းနှင့် ရှေးဟောင်းယဉ်ကျေးမှုကို လေ့လာလိုသူများအတွက် စိတ်ဝင်စားဖွယ်ကောင်းသော နေရာတစ်ခုဖြစ်သည့် သာရနတ်ရှေးဟောင်းသုတေသနပြတိုက်သို့ သွားရောက် လေ့လာကြပါမည်။ ထို့နောက် ဟိုတယ်တွင် နေ့လယ်စာ သုံးဆောင်ပြီးနောက် သာဝတ္ထိ (Sravasti) သို့ ကားဖြင့် ဆက်လက်ထွက်ခွာပါမည်။ ခရီးစဉ်အကွာအဝေးမှာ ခန့်မှန်းခြေအားဖြင့် ၃၂၀ ကီလိုမီတာ ဖြစ်ပြီး ခရီးကြာချိန်မှာ ၆–၇ နာရီခန့် ကြာမြင့်ပါမည်။ သာဝတ္ထိသို့ ရောက်ရှိပြီးနောက် ဟိုတယ်သို့ Check-in ဝင်ပြီးနောက် ညစာသုံးဆောင်ကာ အနားယူအိပ်စက်ပါမည်။

ဟိုတယ်တွင် နံနက်စာသုံးဆောင်ပြီးနောက် သာဝတ္ထိ (Sravasti) ရှိ ဗုဒ္ဓဘာသာဆိုင်ရာ အထင်ကရနေရာများသို့ သွားရောက်လည်ပတ်ပါမည်။ မြတ်စွာဘုရားသည် သာသနာပြုသက်တမ်းတစ်လျှောက် အချိန်ကာလအများစုကို သာဝတ္ထိမြို့တွင် ကုန်ဆုံးတော်မူခဲ့ပါသည်။ မြတ်စွာဘုရားသည် ရာဇဂြိုဟ်မြို့တွင် အနာထပိဏ်သူဌေးကြီးနှင့် တွေ့ဆုံပြီးနောက် အနာထပိဏ်သူဌေးကြီး၏ ဖိတ်ကြားချက်အရ သာဝတ္ထိမြို့သို့ ပထမဆုံးအကြိမ် ကြွရောက်တော်မူခဲ့သည်ဟု ဆိုပါသည်။ ဇေတဝန်ကျောင်းတော်ရာတွင် အာနန္ဒာဗောဓိပင် (Anand Bodhi Tree)၊ ရှေးဟောင်းစေတီပုထိုးများ၊ ကျောင်းတော်အဆောက်အအုံများနှင့် ဗုဒ္ဓဘာသာဆိုင်ရာ အထိမ်းအမှတ်နေရာများအား ဖူးမြော်လေ့လာကြပါမည်။ ထို့နောက် ဟိုတယ်တွင် နေ့လယ်စာ သုံးဆောင်ပြီးနောက် နီပေါနိုင်ငံရှိ လုမ္ဗိနီ (Lumbini) သို့ ကားဖြင့် ဆက်လက်ထွက်ခွာပါမည်။ ခရီးစဉ်အကွာအဝေးမှာ ခန့်မှန်းခြေအားဖြင့် ၂၀၀ ကီလိုမီတာ ဖြစ်ပြီး ခရီးကြာချိန်မှာ ၄–၅ နာရီခန့် ကြာမြင့်ပါမည်။ လုမ္ဗိနီသို့ ရောက်ရှိပြီးနောက် ဟိုတယ်တွင် ညစာသုံးဆောင်ပြီး check-in ဝင်ကာ အနားယူအိပ်စက်ပါမည်။

ဟိုတယ်တွင် နံနက်စာသုံးဆောင်ပြီးနောက် လုမ္ဗိနီ (Lumbini) ရှိ ဗုဒ္ဓဘာသာဆိုင်ရာ အထင်ကရနေရာများသို့ သွားရောက်ဖူးမြော်ပါမည်။လုမ္ဗိနီ (Lumbini) လုမ္ဗိနီသည် ဂေါတမဗုဒ္ဓမြတ်စွာဘုရား ဖွားမြင်တော်မူရာ သာသနာ့မြေ ဖြစ်ပါသည်။ ဗုဒ္ဓမြတ်စွာဘုရား ဖွားမြင်တော်မူသည့် အထိမ်းအမှတ် ရှေးဟောင်းနေရာများနှင့် မွေးဖွားတော်မူပုံကို ဖော်ပြထားသည့် ရုပ်ပွားတော်များကိုလည်း ဖူးမြော်လေ့လာနိုင်ပါသည်။ မာယာဒေဝီဘုရားကျောင်း (Maya Devi Temple) မာယာဒေဝီဘုရားကျောင်းသည် မြတ်စွာဘုရား၏ မယ်တော် မဟာမာယာဒေဝီမိဖုရား အား ရည်စူးတည်ထားသော ဘုရားကျောင်းဖြစ်ပြီး လုမ္ဗိနီသည် မြတ်စွာဘုရားဖွားမြင်တော်မူရာနေရာဖြစ်သည့်အတွက် ဗုဒ္ဓဘာသာဝင်များအတွက် အလွန်အရေးပါသော သွားရောက်လေ့လာဖူးမြော်စရာ နေရာတစ်ခုလည်းဖြစ်ပါသည်။ ဘုရားကျောင်းအနီးတွင် မယ်တော်မာယာဒေဝီ ရေချိုးခဲ့သည်ဟု ယုံကြည်ကြသည့် သန့်ရှင်းသော ရေကန် တစ်ခုလည်း တည်ရှိပါသည်။ အသောကကျောက်တိုင် (Ashoka Pillar) ဘီစီ ၂၅၉ ခုနှစ်ခန့် တွင် အသောကမင်းကြီး တည်ထားခဲ့သော သမိုင်းဝင်ကျောက်တိုင်ဖြစ်ပါသည်။ အသောကမင်းကြီးသည် လုမ္ဗိနီသို့ ရောက်ရှိလာပြီးနောက် ဤနေရာ၏ အရေးပါမှုကို အသိအမှတ်ပြုကာ ဒေသခံများအတွက် အခွန်လျှော့ပေါ့ပေးခဲ့သည်ဟု ဆိုပါသည်။ အချိန်ကာလကြာမြင့်လာသည်နှင့်အမျှ အဆိုပါနေရာသည် တောအုပ်များအတွင်း ပျောက်ကွယ်သွားခဲ့ပြီး ၁၈၉၅ ခုနှစ်တွင် ပြန်လည်ရှာဖွေတွေ့ရှိခဲ့ပြီးနောက် ကျောက်တိုင်နှင့် သာသနာ့အမွေအနှစ်များကို ပြန်လည်ထိန်းသိမ်းထားရှိခဲ့ပါသည်။ ထို့နောက် နေ့လယ်စာ သုံးဆောင်ပြီး ကပိလဝတ် (Kapilvastu) ဒေသမှတစ်ဆင့် ကုသိနာရုံ (Kushinagar) သို့ ကားဖြင့် ဆက်လက်ထွက်ခွာပါမည်။ မြတ်စွာဘုရားရှင်ကိုယ်တော်မြတ်ကြီး မဟာပရိနိဗ္ဗာန်စံတော်မူရာ သာသနာ့မြေ ဖြစ်သည့် ကုသိနာရုံ (Kushinagar) ကုသိနာရုံသို့ သွားရောက်လေ့လာ၊ ဖူးမြော်ကြပါမည်။ ကုသိနာရုံသည် ဗုဒ္ဓဘာသာဝင်များအတွက် အလွန်အရေးပါသော ဘုရားဖူးနေရာတစ်ခုဖြစ်ပြီး နိုင်ငံအသီးသီးမှ ဗုဒ္ဓဘာသာ ဘုန်းတော်ကြီးကျောင်းများ၊ ဘုရားကျောင်းများနှင့် အထိမ်းအမှတ်နေရာများကိုလည်း တွေ့မြင်နိုင်ပါသည်။ ဟိုတယ်တွင် ညစာသုံးဆောင်ပြီးနောက် check-in ဝင်ကာ အနားယူအိပ်စက်ပါမည်။

ဟိုတယ်တွင် နံနက်စာသုံးဆောင်ပြီးနောက် ကုသိနာရုံ (Kushinagar) ရှိ အထင်ကရ ဘုရားဖူးနေရာများသို့ သွားရောက်ဖူးမြော်ကြပါမည်။ ရမ္ဘာစေတီ (Rambhar Stupa) ရမ္ဘာစေတီသည် မြတ်စွာဘုရား၏ ဈာပနမီးသင်္ဂြိုဟ်ရာနေရာ အဖြစ် အထိမ်းအမှတ်ပြုထားသည့် သမိုင်းဝင်စေတီတော် ဖြစ်ပါသည်။ မြတ်စွာဘုရား မဟာပရိနိဗ္ဗာန်စံတော်မူပြီးနောက် မဟာကဿပမထေရ်မြတ်က ဈာပနမီးကို ထွန်းညှိခဲ့သည်ဟု ဆိုပါသည်။ ယနေ့တွင် ရမ္ဘာစေတီ၌ အမြင့် ၁၅ မီတာခန့်ရှိသော အုတ်ပုံစေတီတော်ကို စိမ်းလန်းစိုပြေစွာ ထိန်းသိမ်းထားသည့် ပန်းခြံအတွင်း ဖူးမြော်နိုင်ပါသည်။ မဟာပရိနိဗ္ဗာန်ဘုရားကျောင်း (Mahaparinirvana Temple) မြတ်စွာဘုရား ပရိနိဗ္ဗာန်စံတော်မူသည့် ပုံစံဖြင့် လျောင်းတော်မူနေသော ရုပ်ပွားတော်ကြီး အား ကိန်းဝပ်ပူဇော်ထားသည့် ဤဘုရားကျောင်းအတွင်း မြတ်စွာဘုရားရှင် သက်ရှိထင်ရှားရှိစဉ်ကအတိုင်း ရည်မှန်း၍ ကုသိုလ်ယူဖူးမြော်ကြရင်း အဖွဲ့လိုက်ကြာသင်္ကန်းကပ်လှူကြပါမည်။ မထာကုအာရ်ကျောင်း (Matha Kuar Shrine) တွင် ခန့်မှန်းခြေအားဖြင့် ၁၀ ရာစုခန့်ကာလ မှ ဗုဒ္ဓရုပ်ပွားတော်တစ်ဆူအား ဖူးမြော်နိုင်ပါသည်။ အမြင့် ၃ မီတာခန့်ရှိသော အဆိုပါရုပ်ပွားတော်အား ကျောက်တစ်တုံးတည်းဖြင့် ထုလုပ်ထားသည်ဟု ယုံကြည်ကြပါသည်။ မြတ်စွာဘုရားအား ဘူမိဖဿမုဒြာ (Bhumi Sparsh Mudra) ဖြင့် ဘုရားအဖြစ်သို့ ရောက်ရှိတော်မူပုံကို သရုပ်ဖော်ထားပြီး ဗောဓိပင်အောက်တွင် သီတင်းသုံးနေသည့်ပုံစံအား ဖူးမြော်နိုင်ပါသည်။ ထို့နောက် ဝေသာလီ (Vaishali) သို့ ဆက်လက်ထွက်ခွာပြီး နေ့လယ်စာ သုံးဆောင်ပါမည်။ ဝေသာလီ (Vaishali) သည် ဗုဒ္ဓဘာသာဝင်များအတွက် အထူးအရေးပါသော သာသနာ့မြေတစ်ခု ဖြစ်ပါသည်။ ယနေ့ခေတ်တွင် ငှက်ပျောပင်၊ သရက်ပင်များနှင့် စပါးခင်းများ ဝန်းရံထားသည့် ရွာငယ်တစ်ခုအဖြစ် တွေ့မြင်ရသော်လည်း ရှေးဟောင်းသုတေသနတူးဖော်မှုများမှတစ်ဆင့် ထင်ရှားသော သမိုင်းကြောင်းများကို ဖော်ထုတ်တွေ့ရှိခဲ့သည့် သမိုင်းဝင်နေရာတစ်ခုဖြစ်ပါသည်။ ရာမယဏကျမ်းတွင် ဤဒေသ၌ အုပ်ချုပ်ခဲ့သည့် သူရဲကောင်းမင်း ဝိသာလမင်း အကြောင်းကိုလည်း ဖော်ပြထားပါသည်။ သမိုင်းပညာရှင်များ၏ လေ့လာချက်အရ ဘီစီ ၆ ရာစုခန့်တွင် ဝဇ္ဇီနှင့် လိစ္ဆဝီတို့၏ အုပ်ချုပ်မှုအောက်၌ ကိုယ်စားလှယ်များ ရွေးချယ်တင်မြှောက်သည့် အစည်းအဝေးစနစ်ဖြင့် အုပ်ချုပ်သော ရှေးဦးဒီမိုကရေစီ သမ္မတနိုင်ငံများအနက် တစ်ခု ဤဒေသတွင် ထွန်းကားခဲ့သည်ဟု ယူဆကြပါသည်။ မြတ်စွာဘုရားရှင် အကြိမ်ကြိမ်ကြွရောက်တော်မူခဲ့သည့် ဝေသာလီမြို့ရှိ ဒုတိယသံဃာယနာတင်ရာ၊ လိစ္ဆဝီမင်းတို့ခေါင်းဆေးမင်္ဂလာပြုရာကန်၊ အာနန္ဒာတစ်ခြမ်းပဲ့စေတီနှင့် အာသောကကျောက်စာတိုင် စသည်တို့ကိုသွားရောက်ဖူးမြော်ပါမည်။ (ရတနာသုတ်ကိုလည်း ရွတ်ဖတ်ပူဇော်ပါမည်။) ထို့နောက် ဟိုတယ်သို့ ပြန်လည်ရောက်ရှိပြီး ညစာသုံးဆောင်ကာ အနားယူအိပ်စက်ပါမည်။

ဟိုတယ်တွင် နံနက်စာသုံးဆောင်ပြီးနောက် ရာဇဂြိုဟ် (Rajgir) နှင့် နာလန္ဒာ (Nalanda) သို့ ကားဖြင့် ထွက်ခွာပါမည်။ နာလန္ဒာ (Nalanda) သည် ကမ္ဘာ့ရှေးအကျဆုံး ဗုဒ္ဓတက္ကသိုလ်များအနက် တစ်ခုဖြစ်ပြီး ၅ ရာစုခန့်တွင် စတင်တည်ထောင်ခဲ့သော ရှေးဟောင်းပညာသင်ကြားရာ ဌာနကြီး ဖြစ်ပါသည်။ ရှေးဟောင်းကျောင်းဆောင်များ၊ ဘုန်းတော်ကြီးကျောင်းများနှင့် ဘုရားကျောင်းများကို လေ့လာဖူးမြော်နိုင်ပြီး ဗုဒ္ဓဘာသာနှင့် ဟိန္ဒူဘာသာဆိုင်ရာ ရှေးဟောင်းရုပ်ပွားတော်များကိုလည်း တွေ့မြင်နိုင်ပါသည်။ ထို့နောက် ရာဇဂြိုဟ် (Rajgir) သို့ ဆက်လက်ထွက်ခွာပါမည်။ ရာဇဂြိုဟ်သို့ ရောက်ရှိပါက ဟိုတယ်တွင် Check-in ပြုလုပ်ပြီးနောက် အနီးဝန်းကျင်ရှိ ဘုရားဖူးနေရာများသို့ သွားရောက်လည်ပတ်ပါမည်။ ရာဇဂြိုဟ် (Rajgir / Rajgriha) သည် ရှေးခေတ် အင်အားကြီး မဂဓနိုင်ငံ၏ မြို့တော် ဖြစ်ခဲ့ပြီး ဘုရင်ဗိမ္ဗိသာရ အုပ်ချုပ်တော်မူခဲ့သည့် သမိုင်းဝင်မြို့တစ်မြို့ ဖြစ်ပါသည်။ မြတ်စွာဘုရားနှင့် ဆက်နွယ်သော သာသနာ့မြေနေရာများစွာ တည်ရှိသဖြင့် ဗုဒ္ဓဘာသာဝင်များအတွက် အထူးအရေးပါသော ဘုရားဖူးဒေသတစ်ခု ဖြစ်ပါသည်။ ဂျပန်နိုင်ငံရှိ Nipponzan Myohoji ဗုဒ္ဓဘာသာအဖွဲ့မှ တည်ဆောက်ထားသော အဖြူရောင်ကျောက်စီအဆောက်အအုံပုံစံ စေတီတော်ဖြစ်သည့် ဝိသွာငြိမ်းချမ်းရေးစေတီ (Vishwa Shanti Stupa) အား သွားရောက်ဖူးမြော်ကြပါမည်။ စေတီတော်၏ နံရံအတွင်း အကွက်များတွင် ရွှေရောင်ဗုဒ္ဓရုပ်ပွားတော်များကို ကိန်းဝပ်ပူဇော်ထားပြီး ကမ္ဘာ့ငြိမ်းချမ်းရေးကို ကိုယ်စားပြုသည့် အထင်ကရနေရာ တစ်ခုဖြစ်ပါသည်။ ဂိဇ္ဈကုဋ်တောင် (Gridhakuta) ၏ ထိပ်ပိုင်းသည် လင်းတငှက်၏ နှုတ်သီးနှင့် ဆင်တူသော ကျောက်တောင်ပုံသဏ္ဍာန်ရှိသဖြင့် ဂိဇ္ဈကုဋ်တောင် (လင်းတတောင်) ဟု အမည်တွင်ခဲ့သည်ဟု ဆိုပါသည်။ တောင်ပေါ်ရှိ ကျောက်ထွင်းဂူများတွင် မြတ်စွာဘုရားသည် မိုးတွင်းကာလများစွာ သီတင်းသုံးတော်မူကာ တရားဓမ္မများ ဟောကြားတော်မူခဲ့ပါသည်။ မဂဓမင်း ဘုရင်ဗိမ္ဗိသာရက မြတ်စွာဘုရားနှင့် သံဃာတော်များ သီတင်းသုံးနေထိုင်ရန် တည်ဆောက်လှူဒါန်းခဲ့သော ရှေးဟောင်းကျောင်းတော်ရာတစ်ခုဖြစ်ပြီး ဘုရင်ဗိမ္ဗိသာရက မြတ်စွာဘုရားရှင်အား ပထမဆုံး လှူဒါန်းခဲ့သော ကျောင်းတော်ဖြစ်သည်ဟု မှတ်တမ်းများတွင် ဖော်ပြထားသည့် ဝေဠုဝန်ကျောင်းတော် (Venuvana Vihara) အား သွားရောက်လေ့လာကြပါမည်။ ထို့နောက် ဟိုတယ်တွင် နေ့လယ်စာ သုံးဆောင်ပါမည်။ နေ့လယ်စာ သုံးဆောင်ပြီးနောက် ဗုဒ္ဓဂယာ (Bodhgaya) သို့ ကားဖြင့် ပြန်လည်ထွက်ခွာပါမည်။ ဗုဒ္ဓဂယာသို့ ရောက်ရှိပြီးနောက် ဟိုတယ်တွင် ညစာသုံးဆောင်ကာ အနားယူအိပ်စက်ပါမည်။

ဟိုတယ်တွင် နံနက်စာသုံးဆောင်ပြီးနောက် မြတ်စွာဘုရားရှင် သဗ္ဗညုတဉာဏ်တော် ရရှိတော်မူခဲ့သည့် ဗုဒ္ဓဂယာရှိ မဟာဗောဓိဘုရားကျောင်းနှင့် ဗောဓိပင် သို့ သွားရောက်ဖူးမြော်ပါမည်။ ထို့နောက် ဟိုတယ်သို့ ပြန်လည်ရောက်ရှိပြီး နေ့လယ်စာ သုံးဆောင်ပါမည်။ နေ့လယ်စာ သုံးဆောင်ပြီးနောက် ဂါယာလေဆိပ် (Gaya Airport) သို့ ကားဖြင့် ပို့ဆောင်ပေးပြီး သတ်မှတ်ထားသော လေယာဉ်ဖြင့် ဆက်လက်ခရီးထွက်ခွာပါမည်။ ကုသိုလ်များဖြင့် ပြည့်ဝသော ဗုဒ္ဓဘာသာ ဘုရားဖူးခရီးစဉ် (၈) ရက်တာ အောင်မြင်စွာ ပြီးဆုံးပါမည်။